Coca Cola Суперлиганинг 7-туридан ўрин олган «Бунёдкор» - «Насаф» (2:0) учрашувидан кейин ўтказилган матбуот анжуманининг биринчи қисмида меҳмонлар устози Рўзиқул Бердиев иштирок этди.

- Кўрдинглар, ўйинни хато билан бошладик. Бу вазифамизни қийинлаштирди. Шундай бўлсада, мезбонлар дарвозаси олдида бир қатор вазиятларни юзага келтира олдик. Бироқ айрим вазиятларда омад, қайсидир ҳолатларда тажриба етишмади. Ўйлайманки, шу ҳолатлар бугунги учрашув тақдирини ҳал қилди. Албатта биринчи ўринда натижа туради. Бугун «Бунёдкор»га нисбатан яхшироқ ўйнагандирмиз, аммо ғалаба ва омад мезбонлар тарафида бўлди. Футболда вазиятлардан фойдалана олмасанг, натижага эриша олмайсан. Ушбу гапларим баҳона эмас. Вазиятни яхшилаш учун ҳаракат қилишимиз керак.

«Бунёдкор»ни доим ҳурмат қилганмиз. Жамоа аввалги йилларга нисбатан оддийроқ ўйнамоқда. Илгари тўпни назорат қилиш, позицион футбол намойиш қиларди. Ҳозир тўпни олдинга тепиш билан шуғулланмоқда. Лекин натижа бор. Кубок доирасидаги баҳсга нисбатан енгил қараган бўлишимиз мумкин, чунки гуруҳдан чиқиб бўлгандик. Аммо бугунги беллашувга жиддий ёндошгандик. «Бунёдкор»ни ғалаба билан табриклайман!