Англия чемпионатининг саккизта учрашув кеча бўлиб ўтган бўлса-да, асосий эътибор бугунги ўйинларга қаратилгани шубҳасиз. Лондон ва Манчестернинг азалий тўқнашуви, бунинг устига, лондонликлар биринчи даврада, айни шу қарамақаршиликларда йирик ҳисобларда мағлуб бўлганликлари ҳам интригани бироз оширди. Йўқ, бу сафар ҳам Манчестернинг икки жамоаси характер намойиш қила олди ва рақибларидан етарли фарқ билан олдинга «қочиб кетдилар».

Биринчи таймдаги голсиз, хавфли вазиятсиз курашдан сўнг Сильванинг заргарона тўп узатишини голга айлантирган Насри, бурчакдан оширилган тўп билан бирга дарвозага кириб кетган Лескотдан сўнг, майдон эгалари ғалабани ҳеч кимга бермайдигандек эдилар.
Йўқ, орадан бир дақиқа ўтмади, Юнус Қобул узун пас билан Дефони олдинга чорлади. Ҳимоячи тўпни қайтара олмади, тажрибали Дефо эса дарвозабонни алдаб ўтиб ҳисобни қисқартирди. Беш дақиқа ўтиб эса Бэйлнинг ажойиб зарбасини кўрдик — 2:2

Бир биридан қўрқиб қолган икки жамоа ўйин темпини сал туширдилар, ҳатто меҳмонларда кетма-кет иккита ажойиб имконият бўлди. Аввалига Бэйл, кейин эса унинг тўп оширишадн сўнг Дефога сал қолди. Ўйинни кучайтириш учун майдонга тушган Балотелли эса фақат карточка ишлаганидан бошқа ёдда қолмаётганди. Агар сўнгги дақиқа бўлмаганда...

Жарима майдонига кириб борган Балотеллини тажрибали Кинг чалиб йиқитди. Бу ерда ҳимоячига бироз тезлик ва совуққонлик етишмади, шундоқ ҳам италиялик ҳужумчи унчалик қулайликка чиқмаётганди. Кинг унга қулай шароитни тақдим этди — Балотелли энди пенальти тепади. Футболчига қойил қолиш керак, совуққонликни сақлаб қолди ва айтиш керакки, учрашувни қутқарди — 3:2. Ўз майдонида чемпионат ўйинлари да 15 ўйиндан бери очко йўқотмай келаётган «шаҳарликлар» бу натижани яхшилаб олишди.

Рекорд ўз йўлига-ю, Лондонда оғир учрашув кутиб турган «Манчестер Юнайтед» учун бу қўшимча босим юклади. Ахир асосий рақиб энди олти очкога олдинлаб кетди. Балки бу бир тарафдан «МЮ» ни босимдан халос қилгандир, ким билади.

Лекин дастлабки 15 дақиқани эътиборга олмаса, биринчи таймда «МЮ» рақибидан ҳар томонлама устунлик қилгани ҳақиқат. Тўғри, ҳар сафар ҳам тўп дарвозага зарба беришгача етиб бормади, аммо жамоа ярим таркибини Шесни жарима майдони яқинида «прописка»га ўтказиб олгани бор гап. Айтганча, Фил Жонс бу мавсумда иккинчи ўйинда тайм охиригача етиб бормаяпти. Текис ерда оёғини қайириб олган ҳимоячи 17-дақиқадаёқ ўрнини Рафаелга бўшатиб берди. Рафаел Жонсдан кўра кўпроқ қанотга ихтисослашганлиги Валенсига кўпроқ эркинлик бера бошлади. Аммо «Арсенал»нин чап қанотидан кўра ўнг томон — Журу кўпроқ панд берди. Айнан ўша қанотдан Нани, Эвра каби футболчилар кўпроқ хавф солдилар. Гол ҳам ўша қанотдан уюштирилган ҳужумдан сўнг рўй берди. Райан Гиггз тўпни юқорилатиб оширди, Валенсия эса боши билан ҳисобни очганида биринчи таймнинг сўнгги дақиқаси эди.

Иккинчи таймда «Арсенал» сезиларли даражада кучайди. Камида уч маротаба ўта хавфли зарбалар берилди. Икки марта Робин ван Перси, бир марта Рэмзининг омади келмади. «МЮ» эса кўпроқ қарши ҳужумда ўйнай бошлади.

Ниҳоят, «Арсенал»нинг ҳаракатлари мукофотланди. Айниқса иккинчи таймни жуда яхши ўтказган франциялик ярим ҳимоячи Чемберлен майдон марказини катта тезлик билан босиб ўтди ва жарима майдонига кириб бораётган ван Персига оширди. Дарвозага орқа ҳолатда турган ҳолда ктуилмаган зарбани амалга оширган голландиялик ҳужумчи ҳисобни тенглаштирди. Фергюсон «Арсенал»ни тўхтатишнинг ягона йўли — Робинни тўхтатиш экани ҳақида гапирганда, ҳақ экан.

Голдан сўнг, «Арсенал» ғалабага яқинроқдек кўрина бошлади. Аршавин ҳужумга қўшилди. Меҳмонларда эса аксинча, Нани жароҳат олиб майдонни тарк этди. Яъни агар кимдир гол уриши керак бўлса, кўпроқ «Арсенал» муносиброқ кўрина бошлаган эди. Аммо ўша Нанининг жароҳати, кейинроқ Уолкотнинг бошини ерга уриб олиб, бир муддат хушдан кетганидан кейин юзага келган узоқ узилишлар «МЮ»га қўл келди. Меҳмонларнинг тажрибали футболчилари бундай вазиятлардан қандай фойдаланишни яхшироқ уддаладилар.

Ғалаба тўпи эса оддий эпизоддаги самарали ҳаракат орқали киритилди. Биринчи гол муаллифи Валенсия ўнг қанотда Аршавинни алдаб ўтди ва жарима майдонига кириб, Пак билан девор услубида ўйнади, хотиржамликни сақлаган ҳолда, Уэлбекни тўп билан таъминлади. Бироз олдин Шчесни билан яккама якка чиқиб, вазиятдан фойдалана олмаган ёш ҳужумчи бу сафар адашмади — 1:2.

Бу ерда Фергюсоннинг ўзига хос айёрлигини таъкидлаш керак. Ўнг қанот ҳимоячиси Рафаел ўрнига Пак Жи Сун туширилди. Гуёки энди ўша қанотни Валенси орқага қайтиб ёпиши керакдек эди. шундай бўлди ҳам. Аммо айнан Валенсиянинг ҳужумга яна қўшилгани ва айнан Пак билан комбинация уюштиргани ғалабага сабаб бўлди. 
Шундай қилиб, Манчестернинг икки клуби Лондоннинг уч жамоасидан ўзиб кетдилар. «МЮ» ва «Тоттенҳэм» ўртасидаги фарқ беш очкога етди. Икки Манчестер клублари орасидаги фарқ эса битта ғалабага тенг. Ёки битта мағлубиятга...  

МАНЧЕСТЕР СИТИ — ТОТТЕНҲЭМ 3:2 (0:0)
Голлар: 1:0 — Насри (56), 2:0 — Лескотт (59), 2:1 — Дефо (60), 2:2 — Бэйл (65), 3:2 — Балотелли (90, пенальтидан).
МАНЧЕСТЕР СИТИ: Жо Харт, Ричардс, Савич, Лескотт, Клиши, Сильва, Бэрри, Насри, Милнер, Агуэро, Жеко (Балотелли, 65).
ТОТТЕНҲЭМ: Фридель, Кабуль, Уокер, Кинг, Ассу-Экотто, ван дер Варт (Ливермор, 68), Бэйл, Леннон (Пиенар, 88), Паркер, Модрич, Дефо.
Огоҳлантиришлар: Клиши (10), Паркер (53), Балотелли (79).

АРСЕНАЛ — МАНЧЕСТЕР ЮНАЙТЕД 1:2 (0:1)
Голлар: 0:1 — Валенсия (45), 1:1 — ван Перси (71), 1:2 — Уэлбек (81).
АРСЕНАЛ: Шчесни, Журу (Йеннарис, 46), Косьельни, Мертезакер, Вермален, Окслейд-Чемберлен (Аршавин, 74), Росицки, Рэмзи (Пак Чу-Юнг, 84), А.Сонг, Уолкот, ван Перси.
МАНЧЕСТЕР ЮНАЙТЕД: Линдегор, Ж. Эванс, Смоллинг, Жонс (Рафаэл, 17; Пак Чжи-Сунг, 76), Эвра, Кэррик, Гиггз, Валенсия, Нани (Скоулз, 75), Уэлбек, Руни.
Огоҳлантиришлар: Рэмзи (43), Рафаэл (44), Косьельни (73), ван Перси (86), Росицки (86), Эвра (90), А.Сонг (90).