«Вильярреал» бош мураббийи Унаи Эмери Европа Лигаси яримфиналидан ўрин олган «Арсенал»га қарши жавоб ўйинидан нималар кутаётганини айтди.

«Биз учун ажойиб лаҳза. Европа Лигасидаги йўлимиз шу пайтгача яхши бўлди. Эртанги ўйинга биринчиси каби ёндашамиз. 2:1 ҳисобида олдиндамиз, аммо бу ҳеч нарсани англатмайди. Ҳамма нарсага тайёр бўлишга ҳаракат қиламиз ва финал йўлланмасига эга чиқишни хоҳлаймиз.

«Арсенал» ўйинни яхши қуради, тўпни ушлаб туради, техник жиҳатдан иқтидорли футболчиларга эга. Обамеянг қайтгач, рақиб янада яхши кўринишда бўлади», – дея Эмерининг сўзларини келтиради УЕФА расмий сайти.

«Арсенал» – «Вильярреал» ўйини бугун, 6 май куни бўлиб ўтади. Дастлабки беллашувда Испания клуби 2:1 ҳисобида ғалаба қозонган.