Англия Премьер Лигаси клублари 2020/21 йилги мавсум Еврокубоклардаги муваффақиятли иштироки учун УЕФА коэффициент рейтингида биринчи ўринга кўтарилади, дея хабар қилмоқда ESPN нашри.

Шу тариқа, АПЛ Ла Лигани ортда қолдирган ҳолда 9 йил дегандан илк бор биринчи ўринга кўтарилади.

АПЛ 2007/08 йилги мавсумдан 2011/12 йилги мавсумгача УЕФА рейтингида биринчи бўлган. Инглиз клублари сўнгги беш мавсумнинг учтасида испан жамоаларидан яхшироқ натижа қайд этган ва бу уларга Ла Лига вакилларини қувиб ўтиш имкониятини берди.

Бундан ташқари АПЛ бир мавсум давомида тўпланган коэффициент бўйича Ла Лига рекордини янгилайди. Сабаби АПЛнинг учта клуби Чемпионлар Лигаси ва Европа Лигаси финалига қадар етиб борди.

2015/16 йилги мавсумда «Реал» Чемпионлар Лигасида, «Севилья» эса Европа Лигасида ғолибликни қўлга киритганди. Ўша мавсумда Испания 23,928 рейтинг балли тўплаган. Инглиз клублари жорий мавсум ушбу кўрсаткични қайд этиб бўлди. Еврокубок финалларидан кейин рекорд янгиланади.

Эслатиб ўтамиз, ЕЧЛ финалида «Манчестер Сити» ва «Челси» ўзаро баҳс юритади. Европа Лигаси финалида эса «Манчестер Юнайтед» «Вильярреал» билан ўйнайди.