Angliya Premyer Ligasi klublari 2020/21 yilgi mavsum Yevrokuboklardagi muvaffaqiyatli ishtiroki uchun UYEFA koeffisiyent reytingida birinchi o‘ringa ko‘tariladi, deya xabar qilmoqda ESPN nashri.

Shu tariqa, APL La Ligani ortda qoldirgan holda 9 yil degandan ilk bor birinchi o‘ringa ko‘tariladi.

APL 2007/08 yilgi mavsumdan 2011/12 yilgi mavsumgacha UYEFA reytingida birinchi bo‘lgan. Ingliz klublari so‘nggi besh mavsumning uchtasida ispan jamoalaridan yaxshiroq natija qayd etgan va bu ularga La Liga vakillarini quvib o‘tish imkoniyatini berdi.

Bundan tashqari APL bir mavsum davomida to‘plangan koeffisiyent bo‘yicha La Liga rekordini yangilaydi. Sababi APLning uchta klubi Chempionlar Ligasi va Yevropa Ligasi finaliga qadar yetib bordi.

2015/16 yilgi mavsumda «Real» Chempionlar Ligasida, «Sevilya» esa Yevropa Ligasida g‘oliblikni qo‘lga kiritgandi. O‘sha mavsumda Ispaniya 23,928 reyting balli to‘plagan. Ingliz klublari joriy mavsum ushbu ko‘rsatkichni qayd etib bo‘ldi. Yevrokubok finallaridan keyin rekord yangilanadi.

Eslatib o‘tamiz, YECHL finalida «Manchester Siti» va «Chelsi» o‘zaro bahs yuritadi. Yevropa Ligasi finalida esa «Manchester Yunayted» «Vilyarreal» bilan o‘ynaydi.