7 май куни УЕФА ижроқўмининг фавқулотда йиғилиши бўлиб ўтди. Унда Европа суперлигасини ташкил этишга қарор қилган клубларга нисбатан жазо чораси қабул қилинди.

Тўққизта клуб («Манчестер Юнайтед», «Манчестер Сити», «Ливерпуль», «Челси», «Арсенал», «Атлетико», «Интер», «Милан» ва «Тоттенхэм») Суперлигани ташкил этиш хато ғоя бўлганини тан олиб, футбол оммасидан узр сўради.

Уларга 15 миллион евро миқдорида хайрия божи тўлаш мажбурияти юкланди. Ушбу пуллар Европа бўйлаб футболни ривожлантиришга сарфланади. Шунингдек, бу клублар еврокубоклардаги иштироки орқали бир мавсумда ишлаб топган пулларининг 5 фоизини УЕФАга қайтаришади.

Агар бу жамоалар келажакда УЕФА билан келишувни яна бир марта бузишса, 150 миллион евро миқдорида жаримага тортилишади.

Мазкур клублар мавсум-2024/2025дан кучга кирадиган Чемпионлар лигасининг янги форматига рози бўлишди.

Суперлигадан ҳали чиқмаган 3та клуб («Реал», «Барселона» ва «Ювентус»)га нисбатан бошқа чора қўлланилади ва бу кейинроқ эълон қилинади.