Россиянинг Санк-Петербург шаҳри мезбонлик қилаётган МДҲ Кубоги турнирида гуруҳ босқичига якун ясалди.
"А" гуруҳида Россия ёшлар терма жамоаси сўнгги турни қўшни Туркманистонга қарши ўтказиб, 0:0 ҳисобига имзо чекди. Натижада мезбонлар 7 очко билан гуруҳ пешқадамлигини қўлга киритишди. Туркманистон бўлса жамғарган 4 очкоси билан 3-ўрин эгасига айланди. Сўнгги турда Эстонияни 3:1 ҳисобида мағлуб этган Қозоғистон 6 очко билан иккинчи бўлди. Регламентга кўра энг яхши кўрсаткич қайд этган 3-ўрин эгалари ҳам чорак финалга йўлланма олишлари керак эди. Бироқ Туркманистонга жамғарган 4 очкоси камлик қилди.
"В" гуруҳида юз фоизлик натижа қайд этган Украина ёшлар терма жамоаси 9 очко билан биринчи ўринни қўлга киритди. Молдавия ва Латвия термалари 4тадан очко билан чекланишди. Барча ўйинни бой берган Қирғизистон бўлса турнирни гуруҳ босқичидаёқ тарк этди.
Ва ниҳоят "С" гуруҳида Эрон ёшлари 7 очко билан биринчи бўлишди. Литва ва Беларус терма жамоалари 4тадан очкога эга чиққан бўлишса, Тожикистон 1 очко билан кифояланди.
Чорак финал ўйинлари 25 январь куни бўлиб ўтади. Уларда қуйидаги жуфтликлар кураш олиб боради.
Қозоғистон - Беларус
Эрон - Латвия
Украина - Литва
Россия - Молдова
