«Барселона» бош мураббийи Рональд Куман Испания чемпионатининг 35-тури доирасида бўлиб ўтган «Реал» - «Севилья»га қарши ўйиндан (2:2) сўнг Зайниддин Зиданнинг ҳакамларни танқид қилгани борасида ўз фикрини билдириб ўтди.

«Дастлабки 20 дақиқа давомида «Реал»нинг ўйинини томоша қилдим. Кейин эса телевизорни «Ювентус» - «Милан» учрашувига олдим. Чунки озгина асабийлаша бошладим. Мен бошқа баҳсни томоша қилиб, кейин «Мадрид»нинг натижасини билишни афзал кўраман.

«Реал»нинг ҳакамларга нисбатан норозилиги? Агар кимдир ҳакамлар ҳақида гапирмасликни истаса, бу — мен. Менинг фикрим ўзгармайди. Агар «Реал» ҳакамлар хатога йўл қўйди, деб ҳисоблаётган бўлса, бу уларнинг муаммоси. Мураббий сифатида айтар фикрим шуки, аслида қандай ҳолатларда тўп қўл билан ўйналган ҳисобланишини билмайдиган ҳолатга келиб қолдик», — деди Куман.