"Манчестер Юнайтед" ярим ҳимоячиси Мэйсон Гринвуд ёзда бўладиган Европа чемпионатида иштирок этиши мумкин. Англия терма жамоаси бош мураббийи Гарет Саутгейт у ҳақида илиқ фикрлар билдириб, "у ўйинни қисқа муддат ичида ўзгартириб юбора оладиган кучга эга" деб алоҳида таъкидлади.

19 ёшли форвард терма жамоа сафида Исландия МТЖга қарши, охирги маротаба ўтган йилнинг сентябрь ойида майдонга тушган. Шундан сўнг, «Манчестер Сити» футболчиси Филл Фоден билан терма жамоа турган меҳмонхонага қизларни таклиф қилганлиги туфайли, карантин протоколларини бузганликда айбланиб, терма жамоа сафидан чиқариб юборилганди.

Якшанба куни "Астон Вилла"га қарши сафар ўйинида, Гринвуд гол уриб, жамоасининг ғалабасига ҳисса қўшди. Баҳсни трибунадан жонли кузатган Гарет Саутгейт ўйиндан сўнг, ёш ҳужумчини яна терма жамоа сафида кўриш ниятида эканлигини яшириб ўтирмади.

Эслатиб ўтамиз, Гринвуд барча турнирларда сўнгги 11 ўйинда 7 та гол ва 2 та голли узатмага муаллифлик қилган.