Ўзбекистон терма жамоаси собиқ устози Эктор Купер фаолиятини Конго демократик Республикаси терма жамоасида давом эттиради.

Аргентиналик мутахассис Африка жамоаси билан шартнома имзолаган. Купер 2019 йилда Ўзбекистон терма жамоаси бош мураббийлигидан кетгач, ҳозирга қадар ишсиз юрганди.

Купер Конго ДРга ЖЧ—2022 йўлланмасини қўлга киритиш учун ёрдам беради. Конго ДР ЖЧ—2022 саралаши иккинчи босқичида Бенин, Мадагаскар ва Танзания термалари билан бир гуруҳдан жой олган.

Эслатиб ўтамиз, Эктор Купер 2018—2019 йилларда Ўзбекистон терма жамоасини бошқарганди. Терма жамоа унинг бошқарувида 17 та ўйин ўтказиб, 7 та ғалаба, 6 та мағлубият ва 4 та дуранг қайд этган. Тўплар нисбати эса 19-16 ни ташкил этган.

65 ёшли мураббий фаолияти давомида Аргентинанинг «Уракан», «Ланус», Испаниянинг «Мальорка», «Валенсия», «Реал Бетис», «Расинг», Италиянинг «Интер», «Парма», Туркиянинг «Ўрдуспор», Грециянинг «Арис», БААнинг «Ал-Васл» клубларида, Грузия (2008-2009) ва Миср (2015—2018) терма жамоаларида ҳам ишлаган.