«Олимпик» — «Арал Самали» (3:0) учрашуви якунланганидан сўнг олимпиячилар мураббийи Темур Кападзе ўйин ҳақидаги фикрлари билан ўртоқлашдилар.

Ўйин ҳақида...
— Учрашувга яхши тайёргарлик кўрдик. «Арал»ни ўргандик, ўз олдига катта мақсадлар қўйган янги жамоа. Улар ҳимояда ўйнашини кутгандик. Ўз навбатида бизга осон бўлмаслиги аниқ эди. Болаларга рақиб ҳимояда туриб, ўз бахтини қарши ҳужумдан қидиришини айтгандим. 1-бўлимдаги имкониятлардан фойдаланолмаганимиз сари ўйин қийинлашиб борди. 2-бўлимда гол урганимиздан кейин имкониятлар кўпайди ва фойдаландик. Ўз устимизда ишлашда давом этяпмиз. Анчадан бери ўйнамаганимиз ҳам ўз таъсирини кўрсатди — «Истиқлол» билан ўйинни ўтказиб юбордик. Аммо, йигитлар ўйиндан ўйинга кучаяётгани билиниб турибди.

— «Олимпик» 1-голни уришга қийналяпти, аммо биринчисидан кейин голлар кўпайиб кетяпти. Бунга сабаб рақиблар ҳимоявий ўйин услубини танлаётганими?
— Ҳисоб 0:0 эканида рақиб тартибли футбол ўйнашга ҳаракат қилади. Бизга қарши очиқ футбол ўйнайдиган жамоани ҳозирча кўрмадим. Аммо гол ўтказиб юборганидан кейин рақиб катта куч билан олдинга чиқишни бошлайди. Шундан кейин бўшлиқлар пайдо бўлади. Шогирдларим ана шу бўшлиқлардан унумли фойдаланяпти. Кўпинча ўйин 1-голдан кейин ўзгаради, чунки рақиб очилишни бошлайди.

— Иккинчи бўлимда қанотлар тезкор ўйинчилар билан кучайтирилди (Жиянов ва Раҳимбердиев). Бу олдинда ўйланган тактиками?
— Ҳар бир футболчи биз учун керак. Уларнинг имкониятларини яхши биламан. Асосий таркибдаги ўйинчилар толиққанидан кейин ҳужумга "янги қон" керак эди. Захирадан қўшилганлар ўзини яхши томондан кўрсатди ва урилган голларда ўз ҳиссасини қўшди.