Ла Лига чемпионлиги учун курашаётган "Барселона", "Реал Мадрид" ва "Атлетико" клублари ушбу ҳафта 37-тур доирасида ўз ўйинларини ўтказади. Демак, мана шу учрашувларга бироз тўхталиб ўтамиз.
"Реал"ни бироз қийинроқ рақиб кутиб турибди
"Реал Мадрид" жамоаси ушбу тур доирасида "Атлетик Билбао" майдонига сафар қилади. Рақиб жиддий, айниқса ўз майдонида. Ушбу баҳсда "Реал"нинг ғалабаси сўнгги турда чемпионлик учун курашни таъминлаб беради. Айни дамда "қаймоқранглилар"да 78 очко мавжуд, асосий рақобатчиси "Атлетико" эса 80 очко билан пешқадам бўлиб турибди. "Қаймоқранглилар Ла Лигадаги сўнгги 5 ўйинда 2 ғалаба, 2 дуранг ва 1 мағлубиятни қабул қилиб олди. Уларнинг рақиби "Атлетик" эса айни дам турнир жадвалида 46 очко билан 9-ўринни банд этиб турибди. Бильбаоликлар ҳам сўнгги 5 ўйинда худди "Реал"никидек 2 тадан ғалаба ва дуранг ва бир мағлубиятни қабул қилиб олган. Сўнгги ўзаро 5 ўйиннинг 3 тасида эса "Реал"нинг қўли баланд келган. "Атлетик" эса бир ғалаба қайд этган. Шунингдек, 1 учрашув дуранг билан якунланган.
"Барселона" мотивациясиз ҳолда ўйин ўтказади
Каталония клуби сўнгги ўйинлардаги муваффақиятсиз натижалардан сўнг чемпионлик курашидан деярли чиқиб кетди. Математик имкониятларни йиғиштириб, ҳолис баҳо берсак, клубда ҳеч қандай имконият қолмади. "Кўк-анорранглилар" "Сельта"ни ўз майдонида қабул қилади. Бир қарашда улар асосий фаворит, аммо "Леванте" ва "Гранада" каби қарши муҳим паллаларда очко йўқотган Каталония клубидан ҳар нарса кутса бўлади. Айни дамда каталонияликлар 76 очко билан 3-ўринда бормоқда. "Сельта" эса 50 очко тўплаб, 8-ўринни банд этиб турибди.
Чемпионликка бир қадам
"Атлетико" жамоаси бир неча ой аввал жадвалда яққол пешқадам эди, аммо Симионе шогирдлари кетма-кет очколар йўқотди ва ўз ҳолатини бироз қийинлаштириб қўйди. Турнир якунига 2 тур қолганида "матрасчилар" барибир пешқадамликни ўз қўлига олди ва улар Ла Лига бош совринига жуда яқин. Рақиб ҳам айни дам мотивациясиз ҳолда улар 44 очко билан 11-ўринда. Жамоа турнирда қолиш масаласини ҳал қилган ва еврокубоклар зонаси учун ҳам кураша олмайди. Бундай паллада чемпионликни хоҳлаган "Атлетико" қандай қилиб бўлмасин ғалаба қозониши керак. Мадрид клубининг ҳамма нарса ўз қўлида.
Мана шу тур ўйинлари амалда кўп нарсани ҳал қилиши мумкин. Шунингдек, чемпион масаласига ҳам бу шу турда нуқта қўйилиши мумкин. Демак, Ла Лигада кураш давом этади...
