Африка миллатлар кубоги гуруҳ босқичининг 2-тур учрашувларидан дастлабкиси, «А» гуруҳининг Ливия – Замбия учрашуви Экваториал Гвинеянинг Бата шаҳридаги «Эстадио де Бата» стадиони узра ёғаётган кучли ёмғир туфайли сурилди.

Майдоннинг кўлмакка айланганини кўрган расмий шахслар ўйиннинг бошланиш вақтини суришдан бошқа илож топа олишмади. Тошкент вақти билан 21:00 да бошланиши керак бўлган ўйин 22:15 да старт олди.

Бошланиши бир соату 15 дақиқа кечиктирилган ўйинда 2:2 ҳисоби қайд этилди. Аввалига ливиялик Аҳмад Саъд 5-дақиқадаёқ ҳисобни очган бўлса, замбияликлардан Эммануэль Маюка 29-дақиқада ҳисобни тенглаштирди. Аҳмад Саъд иккинчи бўлим бошларида (48-дақиқа) яна Ливияни олдинга олиб чиқди. Бироқ замибиялик Эммануэль Маюка бу сафар жамоодоши Крис Катонгони қулай позицияга чиқарди ва у ҳисобни тенглаширди – 2:2.

Эслатиб ўтамиз, ушбу ўйиндан сўнг Замбия активида 4 очко, Ливияда 1 очко мавжуд. Худди щу стадионда Тошкент вақти билан 01:15 да Экваториал Гвинея ва Сенегал учрашуви бошланади.