Ўзбекистон Суперлигасининг 9-туридан ўрин олган «Бунёдкор» - «Навбаҳор» ўйинидан кейинги матбуот анжуманида мезбонлар бош мураббийи Шухрат Мақсудов журналистлар саволларига жавоб берди.

«Аввалги турдаги аламли мағлубиятдан кейин, футболчиларнинг руҳий ҳолатини яхшилаш учун ишладик. Ўйлашимча, бугун жамоа мазмунли ўйин кўрсатди. Аммо, бизга футболдаги энг керакли унсур омад етишмади. Шогирдларимга бугунги ўйин учун миннатдорлик билдираман. Бугунги кунда ким кучли бўлса, ўша майдонга тушади.

Миржаҳон Мараҳмадовнинг ўйини шаҳсан мени қониқтирди, шу боис унга ишонч билдирдим. Менимча, бугунги кунда фейр-плейга энг кўп амал қиладиган жамоа «Бунёдкор» бўлса керак. Битта ўша биринчи бўлимда Фаррух Икромов ўйинни тўхтатмаганини айтмаганда, бошқа бундай ҳолат кузатилмади. Мавсум бошида ҳам таъкидлаган эдим.

Яхши ҳомийга эга бўлганимизда трансфер ойнаси ёпилган эди. Биринчи даврани якунлаб олсак, таркибга яхши футболчиларни олишни режа қилганмиз. Янгилар ичида ёшлар жамоасидан ҳам вакиллар бўлади, албатта.

«Навбаҳор»ни «Нефтчи»да ишлаб юрган пайтимдан жуда ҳурмат қиламан. Наманганда футболни яхши кўришади. «Бунёдкор» ҳар бир ўйинга рақибни ҳурмат қилган ҳолда тушади. Жумладан, «Навбаҳор»ни ҳам. Лекин бугунги дуранг биз учун мағлубиятга тенг бўлди», - дея таъкидлади тошкентликлар устози.