Германиянинг “Байер” клубига янги бош мураббий олиб келинади. Янги мавсумда “Байер”га ҳозирги кунда “Янг Бойз”га устозлик қилаётган Херардо Сеоане тайинланиши мумкин. Шартномага кўра 42 ёшли швейцариялик мутахассис “Байер” билан икки йиллик шартнома имзолайди.

Эслатиб ўтамиз, март ойи охирида “Байер” Питер Босчни бош мураббийлик лавозимидан бўшатганди. Кейин эса Германия U-19 терма жамоасининг собиқ устози Ханнес Волф мавсум охиригача вақтинча мураббийлик вазифасини бажарувчи этиб тайинланган эди.

Бундеслиганинг 33 туридан сўнг, “аспиринчилар” 52 очко билан турнир жадвалининг олтинчи поғонасида боришмоқда.

“Байер” Германия чемпионатининг сўнгги тур учрашувини 22 май куни Дортмунднинг “Боруссия” жамоасига қарши ўтказади.