«Барселона» етакчиси Лионель Месси 18 май, сешанба куни Мадридда «Атлетико»даги дўсти Луис Суарес билан учрашди, дея хабар бермоқда Marca.

Манбанинг ёзишича, аргентиналик ва уругвайлик футболчилар ўз рафиқалари ҳамроҳлигида Испания пойтахтидаги итальян ресторанида бирга тушлик қилишган. Лионель Месси Ла Лига сўнгги тури олдидан Луис Суаресни қўллаб-қувватлашни истаган ва 38-тур доирасидаги «Вальядолид»га қарши чемпионлик ўйинида омад тилаган. Қайд этилишича, Лео собиқ жамоадошининг Мадриддаги муваффақиятларини ўзиникидек қабул қилмоқда.

Маълумот учун, сўнгги тур олдидан «Атлетико» 83 очко билан Ла Лигада пешқадамлик қилаётган бўлса, «Реал» ҳисобида икки очко кам – 81 очко мавжуд. «Реал» сўнгги турда ўз майдонида «Вильярреал»ни қабул қилади.

Эслатиб ўтамиз, «Барселона» 37-турда ўз майдонида «Сельта»га ютқазиб (1:2) чемпионлик учун имкониятни йўқотди.