Туркиянинг Анталия шаҳрида ўтказиладиган Чеченистоннинг биринчи президенти Аҳмад Ҳожи Қодиров хотира турнирига бугун қуръа ташланади.

Тошкентнинг "Пахтакор" клуби ҳам иштирок этаётган мусобақада Озарбойжоннинг "Нефтчи", Польшанинг "Полония", Руминиянинг "Рапид", Украинанинг "Металлист", Қозоғистоннинг "Ордабаси", Россиянинг "Терек" клублари қаторида Латвиянинг "Даугава" клуби ҳам иштирок этадиган бўлди. Аслида "Даугава" ўрнида Албаниянинг "Билис" клуби қатнашиши лозим эди. Бироқ мамлакат кубогида майдонга тушиш керак бўлган албан жамоаси турнирда иштирок этишдан бош тортди.

Регламентга кўра 8та жамоа 2та гуруҳга бўлинади. Зонада 1-ўринни қўлга киритган жамоалар ўзаро финалда тўқнаш келишади. Финалчи 70 минг АҚШ доллари билан тақдирланса, мусобақа ғолибига 100 минг АҚШ доллари топширилади.

Тошкентнинг "Пахтакор" клуби кеча тонгда Анталияга йўл олган. Бу ҳақда клуб расмий веб-сайти хабар бермоқда. Қуйида футболчилар рўйхати билан танишиб олишингиз мумкин: Темур Жўраев, Александр Лобанов, Егор Кримец, Акмал Холмуродов, Александр Клецков, Мурод Холмуҳамедов, Наоя Шибимура, Алексей Николаев, Ғулом Ўрунов, Алишер Маҳмудов, Кахи Махарадзе, Дилшод Шарофетдинов, Санибал Ораховац, Азамат Бобожонов, Ильдар Магдеев, Иракли Климиашвили, Нодир Одилов, Фарҳод Тожиев, Баҳриддин Ваҳобов, Шаҳбоз Эркинов, Санъат Шихов, Алишер Азизов. Миллий терма жамоа ихтиёрида бўлиб турган "пахтакорчилар" БАА сафари интиҳо топиши билан Анталияга йўл олишади.