Бугун Сюрих шаҳрида ФИФАнинг 71-конгресси бўлиб ўтди. Видеоанжуман шаклида ўтказилган конгрессда ЎФА биринчи вице-президенти Равшан Эрматов ҳамда бош котиб Аваз Максумов иштирок этди.
ФИФА президенти Жанни Инфантино конгрессни кириш нутқи билан очиб берди. Коронавирус пандемияси туфайли юзага келган қийин вазиятда ҳам маҳаллий ва халқаро футбол учрашувларини ташкил этишга ҳаракат қилганлиги учун ФИФА раҳбари барча аъзо ассоциациаларга миннатдорчилик билдирди.
Конгресс давомида Халқаро Олимпия қўмитаси раиси Томас Бах ҳам нутқ сўзлади. У пандемия даврида спорт турлари орасида биринчилардан бўлиб яна аввалги мавқейини тиклаб олган, халқаро мусобақаларни ўтказишда намуна бўлганлиги учун ФИФАга ташаккур билдириб ўтди.
Кун тартибига кўра ФИФА томонидан 2020 йилги мавсумда амалга оширилган ишлар ва уларнинг молиявий йиллик ҳисоботлари тингланди ва делегатлар томонидан ФИФАнинг 2022 йилги бюджети тасдиқланди.
Шунингдек, ФИФА низомига ўзгартириш киритиш, ушбу низомни қўллашни тартибга солувчи қонун-қоидалар ва Конгресснинг доимий буйруқларига ўзгартириш киритиш бўйича таклифлар бўйича овоз бериш жараёни ўтказилди.
Халқаро футбол федерацияси (ФИФА) Конгресси ташкилотнинг Покистон футбол федерацияси (ПФФ) фаолиятини қонунни бузганлиги сабабли тўхтатиб туриш тўғрисидаги қарорини маъқуллади. Бу ҳақда Доон газетаси ФИФА матбуот хизматига асосланиб хабар берди.
Уларга кўра, ФИФАнинг 71-Конгрессидаги 207 иштирокчидан 203 нафари овоз берган, биттаси қарши ва учтаси бетараф бўлган.
