Аҳмад Қодиров хотирасига бағишланган турнирнинг биринчи учрашувини Тошкентнинг «Пахтакор» жамоаси мағлубият билан бошлади.

Учрашувдан сўнг клуб бош мураббийи Деян Журжевич ўйин ҳақидаги фикрлари билан ўртоқлашди. Мураббий бундай турнирларда натижа эмас жамоанинг мукаммал таркибини тузишга эътибор қаратишини таъкидлаб ўтди.

«Бугун яхши ўйин бўлди. Мусобақада иштирокимиздан асосий мақсад ОЧЛ ва Ўзбекистон чемпионатида муваффақиятли иштирок этишга муносиб тайёрланиш. Шунинг учун мукаммал таркибни тузишни ўз олдимизга вазифа этиб қўйганмиз».

«Бугун биринчи бўлимда мазмунли ўйин намойиш этдик. Ундан кейин рақибларимиз ҳам анойилардан эмас, Польшанинг энг кучли клубларидан бири ҳисобланади. Аммо биз улардан қолишмадик. Аслида бизнинг жамоамиз ҳам кучли клублар қаторига киради. Пенальтидан кейин ўйин тақдири ҳал қилинди. Шу ва бошқа вазиятларда ҳакамга умуман эътирозим йўқ», дея мураббийнинг сўзларидан иқтибос келтириб ўтди «Пахтакор» клуби расмий сайти.