«Лацио» бош мураббийи Эдуардо Рейя «Кьево»га қарши учрашувдан сўнг ўз фикрларини билдираркан, энди унинг жамоасини камроқ танқид қилишларига умид билдирди.
Италия чемпионати 20-туридан ўрин олган «Кьево»га қарши сафар учрашувида римлик футболчилар 3:0 ҳисобида ғалаба қозонишди. 30-дақиқада Эрнанес ҳисобни очган бўлса, ўйиннинг сўнгги дақиқаларида Мирослав Клозе дублга эришди.
«Мен ҳар доим газеталарни ўқиб бораман ва улардаги кескин танқидларга кўникиб қолганман. Футбол журналистлари учун танқид — нон ва сариёғнинг ўзгинаси. Баъзан танқид ўринли, аммо кўпинча асоссиз ва ғаразли бўлади. Бунақанги ҳолатлар, албатта, спорт учун салбий таъсир қилади», деди «Лацио» бош мураббийи.
«Бугунги ғалаба «Лацио» танқидчиларини хотиржам қилишига, қайта қувватланишимиз ва иштиёқимизнинг ошишига хизмат қилишига умид қиламан», дея қўшимча қилди «Лацио» бош мураббийи Эдуардо Рейя.
Италия чемпионатининг 20-туридан сўнг «Лацио» 36 очко билан мусобақа жадвалининг 4-ўрнида бормоқда. Жамоа мусобақа пешқадами — «Ювентус»дан саккиз очкога ортда қолмоқда.