«Наполи» бош мураббийи Вальтер Маццари «Женоа»га қарши учрашувдан (2:3) сўнг ўз фикрлари билан ўртоқлашаркан, шогирдлари ўйиннинг биринчи ярим соатида жуда ёмон ўйин кўрсатишганига норозилик билдирди. Бу ҳақда «Championat.com» интернет-нашри хабар бермоқда.

Италия «А» Серияси 20-тури доирасида «Женоа» майдонида бўлиб ўтган учрашув биринчи бўлимининг қандайдир беш дақиқаси ичида урилган икки гол натижасида «Наполи» иккинчи таймни оғир юк билан бошлади. 70-дақиқада Паласио дублни расмийлаштирганидан кейин, ўйин тақдири ҳал бўлиб улгургандек эди, аммо Кавани ва Лавессининг 80 ва 82-дақиқалардаги голларидан кейин ўйинни қутқариб қолиш умиди пайдо бўлганига қарамай, «Наполи» мавсумдаги 5-мағлубиятдан қутулиб қола олмади.

«Иккинчи бўлимда биз ажойиб «камбек»ни амалга ошира олдик, аммо ўйиннинг бошини тўла расво ҳолда ўтказгандик. Ўйинга киришиб олишимиз учун бизга ярим соат вақт керак бўлди. Бу жамоамизнинг барча аъзолари учун оғир баҳс бўлди. Ўйинга қайта олганимизни ҳисобга олсак, биз бугун дуранг натижага ҳақли эдик», деди Маццари.

«Рақибимиз дастлабки 30 дақиқа давомида биздан кўра ёрқинроқ, шиддатлироқ ва шижоатлироқ ўйин кўрсатди. Иккинчи голни урганимиздан сўнг жуда яхши ҳаракат қилдик, аммо ўйинни қутқариб қолиш учун кечиккандик», деди неаполликлар устози.

«Ҳар уч кунда битта ўйин ўтказаётганимиз таъсирини ўтказаяпти, шекилли. «Наполи» ўсишда давом этиши керак. Чемпионлар Лигасидаги иштирокимиз сабаб «А» Серияда очколар йўқотаяпмиз. Бу фақат жисмоний ҳолат билан боғлиқ муаммо, биз бундай тиқилинч тақвимга энди мослашаяпмиз», дея қўшимча қилди «Наполи» бош мураббийи Вальтер Маццари.

«Наполи» Италия чемпионати 20 тур учрашувлари якунига кўра, 29 очко билан 7-ўринда бормоқда.