Хамес Родригес Колумбия терма жамоасининг "Копа Америка" учун тузилган сўнги рўйхатидан тушиб қолди.
"Эвертон" футболчиси ўтган ҳафта ўз мамлакатига етиб келди ва бир неча кунни дўстлари ва оиласи билан бирга ўтказди. Колумбия миллий терма жамоаси шифокорлари хулосасига кўра, Хамес ҳозирги кунда топ формада эмаслиги маълум бўлди.
Родригес Англиядаги илк мавсумни жароҳатлар туфайли муваффақиятли ўтказа олмади. У юртига қайтиб, терма жамоасининг бўлажак учрашувларига тайёргарлик кўриш мақсадида ҳаттоки "Манчестер Сити"га қарши кечган сўнгги учрашувни ҳам ўтказиб юборган эди.
Мураббийлар штаби Хамес Родригеснинг терма жамоага ёрдам бера олмаслигидан афсусда эканлигини, лекин унинг ўрнини боса оладиган футболчилар борлигини таъкидлади.
Эслатиб ўтамиз, Хамес терма жамоа таркибида 80 учрашувда майдонга тушиб, 23та гол урган ва 25та голли узатмани амалга оширган.
