Бокс бўйича 2021 йилги Осиё чемпионатининг ярим финал баҳслари 28 май, жума куни бўлиб ўтди.

Ўзбекистонлик ўн нафар боксчи рингга кўтарилди. Баҳодир Жалолов кувайтлик Аланзи Абдурраҳмонни иккинчи раунддаги нокаут эвазига таслим этди. У финалда азалий рақиби қозоғистонлик Қамишбек Қўнкабоевга қарши жанг қилади.

Шаҳобиддин Зоиров, Миразизбек Мирзахалилов, Нодиржон Мирзаҳмедов, Бобоусмон Ботуров, Саиджамшид Жаъфаров ва Дилшодбек Рўзметов ҳам ўз жангларини ғалаба билан якунлаб, финалга йўл олди.

Абдумалик Ҳалоков, Элнур Абдураимов ва Санжар Турсунов мағлубиятга учраб, ўз юришини ярим финалда тугатди.

Осиё чемпионати—2021 ярим финал натижалари билан танишинг:

-49 кг: Нодиржон Мирзаҳмедов 5:0 ҳисобида Унуболд Орхонтангалагно (Мўғулистон) мағлуб этди;

-52 кг: Шаҳобиддин Зоиров Азат Усеналиевни (Қирғизистон) таслим этди (4:1);

-57 кг: Миразизбек Мирзахалилов 5:0 ҳисобида Жунмилардо Огайредан (Филиппин) устун келди;

-60 кг: Абдумалик Ҳалоков Ценбатаар Эрденебатга (Мўғулистон) ютқазиб қўйди (2:3);

-64 кг: Элнур Абдураимов 0:5 ҳисобида Чинзориг Баатарсухга (Мўғулистон) мағлуб бўлди;

-69 кг: Бобоусмон Ботуров рақиби Викас Кришан (Ҳиндистон) жангни давом эттира олмагани эвазига техник ғалабага эришди;

-75 кг: Саиджамшид Жаъфаров 5:0 ҳисобида Эумир Марсьялни (Филиппин) мағлубиятга учратди;

-81 кг: Дилшодбек Рўзметов Шаббос Негматуллоевни (Тожикистон) енгди (5:0);

-91 кг: Санжар Турсунов 0:5 ҳисобида Санжитга (Ҳиндистон) ютқазиб қўйди;

+91 кг: Баҳодир Жалолов 2-раунддаги техник нокаут эвазига Аланзи Абдурраҳмонни (Кувайт) таслим этди.