Испания футбол федерацияси расмий сайтининг маълум қилишича, миллий терманинг тўрт нафар янги ўйинчиси йиғинга чақириқ олган.

Улар орасида Родриго Морено («Лидс») ва яримҳимоячилар Пабло Форналс («Вест Хем»), Браис Мендес («Селта») ва Карлос Солер («Валенсия») каби футболчилар бор. Бунгача терма жамоа сардори Серхио Бускетснинг коронавирус учун топширган тести манфий натижа берган эди.

Ушбу футболчилар параллель равишда жамоанинг қолган қисмидан алоҳида ҳолда машқ қилишади. Уларнинг Евро-2020даги иштироки масаласи, кейинчалик терма жамоадаги кадрлар ҳолатига қараб кўриб чиқилади.

Эслатиб ўтамиз, Евро-2020 11 июндан 11 июлгача бўлиб ўтади. «E» гуруҳидаги Испания терма жамоаси Швеция (14 июнь), Полша (19 июнь) ва Словакия (23 июнь) билан ўйнайди.