Қизиқарли тусда бошланиб олган Европа чемпионати давом этади. Бугун ҳисобидан жами 3 та ўйин бўлиб ўтиши режалаштирилган. Дастлаб, Тошкент вақти билан 18:00да «А» гуруҳининг иккинчи ўйинига старт берилади. Унда Швейцария ҳамда Уэльс жамоалари гуруҳ ғолиблиги учун курашга киришишади.
Stadion.uz эса анъанага мувофиқ тарзда терма жамоалар ҳақидаги айрим фактларни бўлишишда давом этади.
Швейцария ҳамда Уэльс шу пайтгача бир-бирлари билан жами 7 марта тўқнаш келишган. Уларда яққол Швейцария қўли баланд келган - 5 та ғалаба. Қолган иккита ютуқ эса Уэлсга тегишли ва ушбу қарама-қаршиликда умуман дуранг натижа қайд этилмаган.
Уэльс
- Ушбу жамоа ўз тарихида илк маротаба кетма-кет тарзда Евро мусобақасида иштирок этмоқда. Жамоанинг тарихидаги дастлабки қитъа чемпионати ҳам айнан 2016 йили бўлиб ўтганини алоҳида таъкидлаш керак.
Бироқ, биринчиси бўлишига қарамай, ўша йили уэлсликлар бутун мусобақанинг сенсациясига сабаб бўлган эди. Англия, Словакия ва Россия жой олган гуруҳдан чиқишни уддалаган дебютант якунда яримфиналга қадар етиб борган ва бўлажак чемпион Португалияга имкониятни бой берганди (0:2). Бироқ ўшангача бўлган йўлда Шимолий Ирландия ва Бельгия сингари рақиблар хотиржам тарзда маҳв этилганининг ўзи ҳам Уэльс учун тарихий натижага қиёс этилди. Ростан ҳам шундай.
- Янгича типдаги мундиалдан олдинги Уэлснинг энг яхши натижаси чорак финал босқичи бўлган. У ерда жамоа Югославияга 1:3 ҳисобида имкониятни бой берганди.
- Уэльс ҳужумчиси Гарет Бэйл Швейцарияга қарши ажойиб натижага эга. У сўнгги икки ўйинида рақиблари дарвозасига 2 та тўп киритган.
- Аарон Ремзи уэсликларнинг сўнгги йирик турнирлари-Евро-2016даги жамоанинг 50% голларида қатнашган. У ўшанда 1 гол ва 4 та ассист қайд этганди.
- Евро-2020га саралаш чоғида Уэльс квалификациянинг дастлабки 2 баҳсини бой берди, бироқ шундан сўнг кетма-кет 5 ўйинда мағлубиятга учрамади ва сўнгги турдаги Венгрия устидан қозонилган ғалаба эвазига финал роундига йўлланмани қўлга киритди.
- Умуман олганда Евро-2016га қадар Уэлс расмий катта мундиалларда бир маротаба иштирок этган. 1958 йили жамоа бўлажак чемпион Бразилияга чорак финалда имкониятни бой бериб қўйганди (0:1).
Швейцария
- Швейцария Еврода 5 та ўйинлик кичик мағлубиятсиз серияга эга. Шунингдек, турнирдаги дастлабки 6 та баҳсни ютказган ягона жамоа ҳам ҳисобланади.
- Ушбу жамоа қитъа чемпионатида жами 5 маротаба қатнашган. Уларнинг учтасида гуруҳдан чиқишнинг уддасидан чиқа олмаган. 2016 йили эса 1/8 финалгача етиб бориб Полшага имкониятни бой бериб қўйган.
- Швейцария Бокуда иккинчи маротаба ўйнамоқда. 1996 йили августда бўлиб ўтган ЖЧ-1998 саралашида мезбонларга 0:1 ҳисобида имконият бой берилган.
- Швейцария Европа чемпионатларида жами 13 маротаба қатнашган. Улардан 2 тасида ғалаба қозонган бўлса, 5 таси дуранг ва 6 та баҳс мағлубият билан тугаган.
- Швейцария Еврога оид мусобақаларнинг сўнгги 14 тасидан биттасида мағлубиятга учради. У 2019 йили октябрда қайд этилган эди. Шундан бери 8 та ғалаба ва 5 дуранг. Жамоа Евро-2016ни мағлубиятсиз ўтказгани ҳам алоҳида эътиборга молик.
Бундан ташқари Швейцария ўзининг Миллатлар лигасидаги дебют мавсумини ажойиб тарзда ўтказди. Жамоа яримфиналга қадар етиб борди. Фақат 3-ўрин учун баҳсда Англияга 1:3 ҳисобида имконият бой берилди.
- Владимир Петкович Швейцарияни кетма-кет 3 та йирик мундиалга бошлаб тушган иккинчи мураббийга айланди. У 2014 йилдан бери ушбу лавозимда ишлаб келмоқда.
Юсуфбек Сайдалиев тайёрлади
