Австралия сайтлари Тошкентдаги совуқ ҳаво ҳақида бонг ура бошлашди.

"Австралияликлар ўзлари учун нотаниш бўлган минусли ҳаво ҳароратига тушиб қолишди. Синоптиклар -10-17 даража бўлиши тахмин қилишмоқда. Шамол билан биргаликда ҳаво ҳарорати -23га етиши мумкин", дея ёзади heraldsun.com.au сайти.

Уч кун давомида Дубайда шуғулланган "олеруз" жума куни Тошкентга етиб келганидан кейин бундай ҳавода шокка тушиб қолган. Қор билан қопланган Тошкент суратларини улар интернетга жойлашган. Уларнинг таъкидлашича, Ўзбекистон жаҳон футболининг мураккаб йўналишларидан бири экан.

"Биз бугун машғулот ўтказамиз ва унда иккита нарсани билиб оламиз. Биринчидан, ўйин бўладиган майдоннинг ҳолатидан бохабар бўламиз. Иккинчидан, бундай ҳавода қанчалик ўйнай олишимизни билиб оламиз. Албатта, бундай ҳолатда ўйнаш осон эмас, — дейди Аурелио Видмар. — Аммо йигитлар бундай шароитда ҳам ўйнашга тайёр".

Австралияликлар ўзларининг ошпазларини ҳам Тошкентга олиб келишди. 2008 йилда Жейсон Чулина ва Жейд Норт Ўзбекистонга келганида овқатдан захарланган экан.

"Биз воқеа Ўзбекистонда содир бўлганини яхши биламиз. Шунинг учун футболчиларимизнинг касал бўлиб қолишини олдини олишимиз керак", дея давом этди Видмар.