Франция терма жамоаси ҳужумчиси Оливье Жиру терма жамоадаги ўрни ҳақида ўз фикрлари билан ўртоқлашди.

34 ёшли футболчининг сўзларига кўра, у Франция терма жамоасига фойда келтирмоқчи.

"Мен ҳали тугамадим. Сиз менга ишонишингиз мумкин. Бобой ҳали ўлгани йўқ! Мен деярли 35 ёшдаман, лекин менда 20 ёшли йигитнинг иштиёқи бор.

Францияда ақл бовар қилмас ҳужумчилар бор, аммо мен каби футболчилар йўқ. Жамоа сифатида қандай ўйнашни биламан. Мен ҳали ҳам иштиёқимни йўқотганим йўқ ва агар ёшлар ўрнимни эгалламоқчи бўлса, яхшироқ тайёргарлик кўришлари керак", - деди Жиру.

Европа чемпионати гуруҳ босқичининг сўнгги турида Франция Португалия билан ўйнайди. Ўйин 23 июнь чоршанба куни бўлиб ўтади.