Хабарингиз бор, "Бунёдкор" сафида эстониялик футболчи Юрий Евдокимов кўрикда бўлди. Аммо мураббийлар ушбу футболчини ўз таркибида олиб қолишни маъқул топмадилар. Футболчи Эстонияга қайтиб борганидан кейин ўзининг таассуротлари билан ўртоқлашди.

Кўрикдан ўтиш учун Евдокимовга таклиф январь ойида тушганди. Ўйинчи ўз ҳиссиётларин яшира олмаганди: "Бундай профессионал жамоа йиғинида ўз кучимни синаб кўришдан жудаям хурсанд бўлдим". Ўзининг нималарга қодирлигини кўрсатиш учун футболчи "Бунёдкор"нинг Дубайдаги йиғинига йўл олди.

— "Бунёдкор" жудаям жиддий клуб. Улар юқори савияда ўйнашади ва ўйинчиларнинг маошлари миллион долларларда ҳисобланади, — дейди Евдокимов. — Жамоада 4та мураббий иш олиб боради. Улардан бирини ишонч билан бош мураббий дейиш мумкин. Қолган 3 нафар мураббий эса бошқа йўналишларга жавоб беради. Ушбу йиғинда иштирокимда қониқиш ҳосил қилдим".

Ўзбекистон чемпионатида легионерлар "3+1"га қисқарди. Улардан камида биттаси осиёлик бўлиши керак.
— "Бунёдкор"дагилар мен билан келаси йили кўришишларини айтишди", дейди Евдокимов. — Умид қиламан, кейинги сафар янада яхшироқ таассурот уйғота оламан".