Сербиялик 27 ёшли ҳимоячи Боян Малишич бундан роппа-роса бир йил илгари “Насаф”нинг Туркиядаги ўқув-йиғин машғулотлари пайтида жамоа таркибига кўрикдан ўтиш учун келганди. Тезкор ҳимоячининг ҳаракатлари жамоа мураббийларига маъқул келди ва у клуб билан шартнома тузди. Боян Қаршида бир мавсум тўп сурган бўлсада, жамоа иштирок этган барча уч мусобақада ўзининг яхши томонларини намойиш этди ва қаршилик мухлисларнинг ёқимтой футболчисига айланди. Йил бошида ушбу футболчи жамоа билан тузган шартномасини яна узайтирди. Айни пайтда Малишич “Насаф”нинг Туркияда ўтаётган ўқув-йиғин машғулотларида иштирок этмоқда.
Куни кеча сербиялик ҳимоячи клуб матбуот хизмати вакилларига интервью берди.
- Боян “Насаф” сафига келиб қўшилганингга бир бўлди. Бу жамоа илгари тўп сурган жамоаларингдан нимаси билан фарқ қилади?
- “Явор” (Сербия)да тўп тепган пайтимда ҳам жамоада дўстларим кўп эди. Бироқ “Насаф” билан солиштирганда кичик, аммо жудаям муҳим жиҳат бор: бизда дейлик ҳимоячи хатога йўл қўйганда ҳеч ким кечирмайди. Футболда хатосиз ўйнаш имконсиз. Ҳамма ҳам қайсидир вазиятда хатога йўл қўяди. Бу ерда эса Худо кўрсатмасин шунақа вазиятга тушиб қолганизда жамоадошларингиз сизни ҳар томонлама қўллаб-қувватлашади. Бу футболчининг ўзига бўлган ишончини ошишида жудаям муҳим. Шу боис “Насаф”да тўп тепиш менга маъқул келмоқда ва БАА даги йиғин давомида мен жамоа билан шартномамни узайтирдим.
- Замонавий ҳимоячи учун асосий ҳислат нима? Қайси футболчиларни бу борада идеал деб ҳисоблайсан?
- Италиялик Паоло Малдини ва Алесандро Нестага ҳавас қилганман. Уларнинг ҳатти-ҳаракатлари менда жуда илиқ таасурот қолдирган ва ўзим ҳам уларга ўхшашга ҳаракат қиламан. Улар нафақат майдонда, майдондан ташқарида ҳам жамоадошларни қўллаб-қувватлаб келишган. Айтмоқчи бўлганим,уларнинг инсоний хислатлари ҳам алоҳида таҳсинга лойиқ. Замонавий ҳимоячи биринчи навбатда ўйинда фикрини бир жойга жамлаб (концентрация) босиқ ва совуққон бўлиши керак, менинг назаримда. Қолаверса, бош билан ҳам тез ва аниқ ҳаракат қилиш керак. Вазиятнинг боришига қараб қисқа сониялар ичида керакли позияни танлаб, рақиб ҳужумини бартараф этиши керак. Жисмоний жиҳатдан ҳам етук бўлиши керак. Тўғриси, шахсан ўзим учрашув тугаганидан кейин ҳам ўтган ўйинни хаёлимда таҳлил қиламан ва қайсидир жойда қандай нотўғри ҳаракат қилган бўлсам, кейинги сафар бошқача ҳаракат қилишга интиламан.
- Ҳимоячи сифатида ўзингни ҳаракатларингни қандай баҳолайсан?
- Билмадим, ўзимга ўзим баҳо беришим қийнроқ. Менимча, шу чап оёқда ўнг оёқдагидек ўйнай олмаслигим бўлса керак.
- Жамоага янги қўшилган пайтингда машғулотларда бир неча бор жарима тўпи тепганингга гувоҳ бўлганман...
- Жамаомизда Эдик (Эркин Бойдуллаев), Шер (Шерзод Аъзамов) яхшигина зарбага эга бўлган футболчилар бор. Шу боис мен ҳимояни эпласам ҳам бўлаверади.
- Ўзбекистон чемпионатида бир мавсум тўп тепдинг. Бу борада фикрларинг қандай?
- Жуда қизиқарли ва қизғин курашларга бой бўлган биринчилик. Умид қиламанки, мен бу биринчиликда кўплаб учрашувларни ўтказаман ва жамоамнинг ғалабасига ҳисса қўшаман Фақатгина айрим стадионларда майдоннинг ҳолатига ҳавас қилиб бўлмайди..
- 2011 йилги мавсумда қайси ҳужумчига қарши тўп суриш қийин кечди?
- Бирозгина ҳамюртим Трифуновичга нисбатан. У ўйин охиригача майдонда ҳеч қандай вазифани бажармаслиги мумкин. Аммо ўйин охирида биргина аниқ ҳаракат билан мақсадига эришиши мумкин. Жарима майдони ичида у жудаям ҳавфли ҳужумчи.
- Соч турмагига алоҳида эътибор берасан. Бу борада шахсий сартарошинг борми?
- Ҳа, албатта. Тошкентлик Акмал исмли сартарош хизматларидан фойдаланаман. У 43 ёшда. Футболнинг ашаддий ишқибози. Ҳар бир ўйиндан кейин телефон қилиб, ҳол-аҳвол сўраб туради. Ҳозирги турмагим америкалик машҳур санъаткор Шон Паулдан “ўғирланган”. Унинг қўшиқларини севиб тинглайман. Шу боис унга соч турмагимни айнан уникига ўхшатишга ҳаракат қилдим.
- Янги мавсумдан нималарни кутаяпсан?
- Албатта, оғир бўлади. Олдимизда янги вазифалар, янги довонлар турибди. Осиё чемпионлар лигасида қатнашамиз. Бу қитъанинг нуфузли мусобақаси. Унда яхши қатнашсак Ўзбекистоннинг обрўси ошади. Гуруҳдан кейинги босқисчга йўл олишга кучимиз етади деб ўйлайман. Миллий чемпионатдаям савияли жамоалар сони ошаяпти. Умуман олганда ҳар бир жамоа “Насаф”га қарши бор кучи билан ҳаракат қилади. Шу боис биз ҳам шунга яраша ҳозирлик кўрамиз. Жанговар ўйинлар сони кўпаяди. Бундан албатта мухлислар ютишади.
- “Насаф” мухлислари ҳақида қандай фикрдасан?
- 10 баллик тизимда уларга 11 балл қўярдим (кулиб). Тўғриси, улар билан фахрланаман. Уларнинг ўйин давомида бизни қўллаб қувватлашлари, “Пике, Боян” деб қичқиришлари менга куч бағишлайди. Улар чин юракдан бизни уйдаги ўйинларда ҳам, сафарда ҳам қувватлаб келишади. Ишқибозларимиз нафақат Қаршида, Тошкентда ҳам жуда кўпчилик. Биз айнан улар учун ўйнаймиз ва бу мен учун ўта ёқимли.
- Сўнгги савол: “Насаф” таркибида ОФК кубоги ғолибига айландинг. Ўзбекистон чемпионати кумуш медалини қўлга киритдинг. Илгари ҳеч бу каби турнирларда шоҳсупага чиққанмисан?
- Йўқ. Болалигимда кичик турнирларда қатнашиб, совриндор бўлганман. Лекин профессионал фаолиятимда айнан Ўзбекистонга келиб совринларга эришдим.
Суҳбатдош Азиз НУРИЙ.
