Аргентина терма жамоаси Бразилияда бўлиб ўтган Америка кубоги мусобақасида бош совринни қўлга киритди. "Альбиселесте" финалда мезбонларга қарши майдонга чиқиб, кичик ҳисобда ғалаба қозонди.

Биринчи бўлимда аргентиналиклар тўпни назорат қилишган бўлса, "пентакампеонлар" бироз эҳтиёткор ўйни намойиш қилишди. Учрашувнинг 22-дақиқасида эса ҳисоб очилди. Де Пауль олис масофадан Ди Мария томон узатма берди. Ҳимоячи Лоди тўпни қайтара олмади. Анхель эса яккама-якка вазиятда тўпни дарвозабоннинг устидан ошириб, тўрга жойлаб қўйди.

Иккинчи бўлимда Бразилия ўз ўйинини ўзгартириб, ҳужумга кўпроқ ўта бошлади. 52-дақиқада улар ҳисобни тенглаштиришган эди, аммо Ришарлисон офсайдда бўлгани учун гол бекор қилинди.

Кейинги дақиқаларда аргентиналик посбон Эмилиано Мартинес камида 3та сэйв намойиш этиб, ўз дарвозаси дахлсизлигини сақлаб қолди. Ўйиннинг асосий вақти тугашига 2 дақиқа қолганида Аргентина хавфли қарши ҳужум ташкил қилди. Месси эса дарвозабон билан яккама-якка вазиятда ўз имкониятидан фойдалана олмади.

Иккинчи таймга қўшиб берилган 5 дақиқада Аргентина рақибга имкон бермасликка ҳаракат қилди. Ҳакамнинг ҳуштаги янграганидан кейин эса Лионель Месси ўз фаолиятида илк марта Америка кубогини қўлга киритгани расман тасдиқланди.

Америка кубоги, Финал
Аргентина – Бразилия 1:0 (1:0, 0:0)
Гол: 1:0 – 22 Ди Мария.
Аргентина – Мартинес, Отаменди, Ромеро (Пеццелья, 79), Монтиель, Акунья, де Пауль, Паредес (Родригес, 54), Ло Чельсо (Тальяфико, 63), Ди Мария (Паласиос, 79), Месси, Мартинес (Гонсалес, 79).
Бразилия – Эдерсон, Лоди (Эмерсон, 76), Данило, Тиаго Силва, Маркиньос, Фред (Фирмино, 46), Каземиро, Лукас Пакета (Габриэл Барбоза, 76), Эвертон (Винисиус Жуниор, 63), Неймар, Ришарлисон.
Огоҳлантиришлар: Фред (3), Паредес (33), Ло Чельсо (51), де Пауль (68), Лоди (70), Лукас Пакета (72), Отаменди (81), Маркиньос (82), Монтиель (89).