УЕФА Ҳакамлар қўмитаси раиси Роберто Розетти Евро-2020 ярим финал босқичи бўлиб ўтган Англия ва Дания терма жамоалари ўртасидаги ўйинни бошқарган ҳакам Данни Маккели данияликлар дарвозаси томон пенальти тўғри белгиланганини айтиб ўтди. Эслатиб ўтамиз, инглизлар ҳужумчиси Раҳим Стерлинг жарима майдончаси йиқилган пайтда белгиланган пенальти баҳсларга сабаб бўлди. Англия эса қўшимча бўлимларда ушбу вазият ёрдамида гол уриб, ғалабани илиб кетди.

«Биз ушбу вазиятни муҳокама қилишимиз мумкин. Чунки, биз муҳокамалар учун очиқмиз. Аммо пенальти тўғри белгиланди. Ҳакам вазиятни кўрди, видеоассистент рефери тизими (VAR) қарор тўғри эканини тасдиқлади. Бу вазиятда ҳимоячи тўпга тегмади, аммо ҳужумчи билан контакт бор эди», — деди Розетти.

Розетти, шунингдек, Европа чемпионатида ҳакамлар иши аъло даражада бўлганини таъкидлади.

«Евро-2020да ҳакамлик муваффақиятли бўлди. Биз ҳакамлар, уларнинг ёрдамчилари ҳамда VARнинг аъло даражада ишлаганига гувоҳ бўлдик. 51та ўйин ўтказилди, танқидлар учун сабаблар эса кам бўлди.

Шунингдек, ўйинчилар, мураббийлар ҳакамларни ҳурмат қилишганини таъкидлашни истардим. Шу боис, мусобақа давомида ҳакамлик савияси ва VAR ишидан тўла қониқиш ҳосил қилдик», — деди Розетти.