UYEFA Hakamlar qo‘mitasi raisi Roberto Rozetti Yevro-2020 yarim final bosqichi bo‘lib o‘tgan Angliya va Daniya terma jamoalari o‘rtasidagi o‘yinni boshqargan hakam Danni Makkeli daniyaliklar darvozasi tomon penalti to‘g‘ri belgilanganini aytib o‘tdi. Eslatib o‘tamiz, inglizlar hujumchisi Rahim Sterling jarima maydonchasi yiqilgan paytda belgilangan penalti bahslarga sabab bo‘ldi. Angliya esa qo‘shimcha bo‘limlarda ushbu vaziyat yordamida gol urib, g‘alabani ilib ketdi.

«Biz ushbu vaziyatni muhokama qilishimiz mumkin. Chunki, biz muhokamalar uchun ochiqmiz. Ammo penalti to‘g‘ri belgilandi. Hakam vaziyatni ko‘rdi, videoassistent referi tizimi (VAR) qaror to‘g‘ri ekanini tasdiqladi. Bu vaziyatda himoyachi to‘pga tegmadi, ammo hujumchi bilan kontakt bor edi», — dedi Rozetti.

Rozetti, shuningdek, Yevropa chempionatida hakamlar ishi a’lo darajada bo‘lganini ta’kidladi.

«Evro-2020da hakamlik muvaffaqiyatli bo‘ldi. Biz hakamlar, ularning yordamchilari hamda VARning a’lo darajada ishlaganiga guvoh bo‘ldik. 51ta o‘yin o‘tkazildi, tanqidlar uchun sabablar esa kam bo‘ldi.

Shuningdek, o‘yinchilar, murabbiylar hakamlarni hurmat qilishganini ta’kidlashni istardim. Shu bois, musobaqa davomida hakamlik saviyasi va VAR ishidan to‘la qoniqish hosil qildik», — dedi Rozetti.