Лондоннинг «Вест Хем» клуби Киевнинг «Динамо» ва Украина терма жамоаси дарвозабони Георгий Бушанга қизиқиш билдирмоқда, дея хабар беради Evening Standard.
Манбага кўра, инглиз клуби раҳбарияти аллақачон киевликлар билан музокараларнинг биринчи босқичини ўтказган. «Вест Хем» таркибида Бушан асосий дарвозабон Лукаш Фабиански билан рақобатга киришишига тўғри келади.
Аммо украиналик киперни сотиб олиш «болғачилар»га қийинчилик туғдириши мумкин, чунки «Динамо» президенти Игор Суркис уни 15 миллион еврога баҳолаган.
Ўтган мавсум 27 ёшли кипер «Динамо» таркибида барча турнирлар доирасида 35 учрашув ўтказиб, 27 та гол ўтказиб юборган. Унинг Украина клуби билан шартномаси 2023 йилнинг ёзигача амал қилади.
