Туриннинг "Ювентус" клуби бош мураббийи Антонио Конте Италия кубоги яримфиналида "Милан" устидан қозонилган ғалабадан сўнг, клуб расмий сайти фойдаланувчилари ва журналистларнинг саволларига жавоб бериб ўтди. Мураббий жуда оғир кечган учрашувда ўз шогирдларининг ўйинидан мамнун эканлигини яшириб ўтирмади.
"Бугунги натижадан ҳам кўра шогирдларимнинг кўрсатган ўйинидан жуда хурсандман. Улар барча кўрсатмаларни тўлиқ бажаришди ва майдонда борларини бериб ўйнашди. Жамоамизнинг янги аъзолари эса менинг ишончимни тўла оқлашди. Падоин кутганимдек ўйин кўрсатди, у билан "Аталанта"да бирга ишлаганмиз. Касерес эса бугун майдонда энг яхшилардан бири бўлди. У нафақат ҳимояда яхши ўйин кўрсатди, балки ҳужумда ҳам ажойиб ўйин намойиш эта олишини исботлади. Унинг икки голи бунга мисол. Касерес-фантастик футболчи. Унинг Туринга қайтишини жуда истагандим ва бу хақда жамоа раҳбарларига айтган эдим. Унинг ва мен истаган бошқа футболчиларнинг жамоамизга келиб қўшилганидан хурсандман. Биз тўғри йўлдан кетаётганлигимизни исботлаяпмиз"- дейди Конте, клуб расмий сайтига берган интервьюсида.
