2022 йилнинг июнь ойида «Реал»нинг бирданига 5 нафар футболчиси билан ўртадаги шартномалари муддати тугайди. Гап Бэйл, Модрич, Иско, Варан ва Марсело ҳақида кетмоқда. Бензема ва Карвахалнинг ҳам «Реал» билан келишувлари якунланади, аммо Испания клуби улар билан амалдаги шартномаларини узайтирди, фақат бир нечта тафсилотлар ҳал қилинмоқда.
«Реал» президенти жамоани ёшартиришни ва катта маош оладиган ёши катта футболчилардан халос бўлишни режалаштирмоқда. Флорентино Перес 2022 йилда Мбаппе ва Холландни сотиб олиш клуб бюджетига жиддий зарба бермаслиги учун иш ҳақи фондини 92 миллион еврога қисқартириш кераклигини ҳисоблаб чиқди. Француз «Реал»да 50 миллион евро (25 миллион маош ва шунча солиқларни тўлаши керак), Холланд эса 42 миллион евро (солиқлардан кейин 21 миллион) олади деб ишонилади.
