Италия «А» Серияси 23-тур ўйинлари старт олди.

Турни «Лацио» ҳамда «Чезена» жамоалари ўртасидаги учрашув очиб берди. Чемпионлар Лигаси йўлланмаси учун кураш олиб бораётган «Лацио» учун мусобақа аутсайдерларидан бирига қарши ўйин осон кечгани йўқ.

Ўйиннинг 14-дақиқасида Адриан Мутуни «Чезена»ни ҳисобда олдинга олиб чиққан бўлса, 35-дақиқада Винченцо Яквинта пенальтидан ҳисобни 2:0га етказди. Бунгача эса қўпол қоидабузарлиги учун «Лацио» ҳимоячиси Абдулай Конко майдондан четлатилганди.

Иккинчи бўлимда римлик футболчилар ҳақиқий матонат кўрсатиб, «Чезена»дан ғалабани юлқиб олишди. 53-дақиқада Эрнанес ҳисобни қисқартирган бўлса, 61-дақиқада Сенад Лулич ўртадаги мувозанатни тиклади. Орадан икки дақиқа ўтар-ўтмас Либор Козак охир-оқибат «Лацио»га ғалаба келтирган гол муаллифига айланди.

Ушбу ғалабадан сўнг «Лацио», камида икки кунга, мусобақа жадвалида 3-ўринга кўтарилиб олди. Агар 11 февраль, шанба куни бўлажак «Милан»га қарши ўйинда «Удинезе» ғалаба қозонса олса, у ҳолда «Лацио» яна тўртинчи ўринга тушиб қолиши мумкин.

23-турнинг қолган учрашувлари шанба, якшанба ва душанба кунлари давом этади.

Италия «А» Серияси
23-тур учрашуви

9 февраль, пайшанба
ЛАЦИО – ЧЕЗЕНА 3:2 (0:2)
Голлар: Эрнанес (53), Лулич (61), Козак (63) — Муту (14), Яквинта (35).
Четлатиш: Конко (35, «Лацио»).

11 февраль, шанба
Удинезе – Милан
Кальяри – Палермо

12 февраль, якшанба
Парма – Фиорентина
Катания – Женоа
Аталанта – Лечче
Интер – Новара
Болонья – Ювентус

13 февраль, душанба
Наполи – Кьево
Сиена - Рома