Ёш таэквондочимиз Улуғбек Рашитов бироз аввал Токио-2020 Олимпиадасидаги иккинчи жангини ўтказди. Нимчорак финал босқичида ҳамюртимиз кореялик Ли Де Хунга қарши даянга чиқди. Ли ушбу вазн рейтингида энг юқори поғонани эгаллаб турган бўлиб, у 3 карра жаҳон чемпиони, Олимпия ўйинларининг 2 карра совриндори ҳисобланади.

Дастлабки раундда кореялик спортчи устунликни ўз қўлига олиб, 10:3 ҳисобида олдинга ўтиб олди. Иккинчи бўлимда эса Улуғбек фарқни бироз қисқартирди ва ҳисоб 17:11 кўринишига келди.

Рашитов учинчи раундда ҳисобдаги фарқни нафақат йўққа чиқарди, балки бир очко олдинга ҳам ўтиб олганди. Баҳс тугашига 11 сония қолганида ҳамюртимизга огоҳлантириш берилиши натижасида ҳисоб тенглашди (19:19) ва навбат қўшимча бўлимга берилди.

Ватандошимиз 43-сонияда рақиб танасига 2 очколик олтин зарбани бера олди ва фаворитни мусобақадан чиқариб юборди.

Улуғбек Рашитов чорак финалда яна бир кучли спортчи — эронлик Мирҳошим Ҳуссайнийга қарши даянга чиқади. Ушбу жанг Тошкент вақти билан 10:54да бошланади.