Токио олимпиадасининг иккинчи кунида ҳисобимизга олтин медални қўшиб қўйдик. 19 ёшли таэквондочимиз Улуғбек Рашитов сенсацион равишда чемпионликни қўлга киритди.

Ҳамюртимиз финалда рейтингнинг иккинчи поғонасини эгаллаб турган британиялик Брэдли Синденга қарши даянга чиқди.

Спортчилар ўта муросасиз жанг олиб боришди. Дастлабки икки раунддан кейин Улуғбек кичик фарқ билан олдинда борди. Учинчи бўлимда эса очиқ жанг бошланиб кетди. Баъзида у спортчи, баъзида буниси ҳисобда олдинга чиқиб олди.

Баҳс тугашига 5-6 сония қолганида Рашитов айланма зарба билан рақибнинг қорнини аниқ нишонга олгани учун бирданига 4 балл тўплаган ҳолда ҳисобда олдинга ўтиб олди ва жангни ғалаба билан якунлади — 34:29!

Ўзбекистон делегацияси олимпия ўйинлари тарихида илк марта таэквондо спорт турида олтин медални қўлга киритди.

Дастлабки олтин медаль муборак бўлсин, азиз ҳамюртлар!