Япониянинг Токио шаҳри мезбонлик қилаётган Олимпия ўйинларида ўзбекистонлик спортчилар 5 август кунги чиқишларини якунлашди. Натижалар билан таништириб ўтамиз.

Енгил атлетика. Баландликка сакраш. Светлана Радзивил саралаш баҳсларида ўз иштирокини тугатди (190 см.)

Сафина Садуллаева эса 1.95 метр баландликка сакраб, 7 август кунги финал йўлланмасини қўлга киритди.

Эркин кураш. 86 кг. Жавраил Шапиев Стефан Рихмутни 5:2 ҳисобида енгди. Аммо бронза учун россиялик Артур Найфоновга ютқазиб қўйди.

57 кг. Ғуломжон Абдуллаев бронза медаль учун юришини биринчи беллашувнинг ўзида тўхтатишга мажбур бўлди — 1:11.

74 кг. Бекзод Абдураҳмонов илк босқичда 10:0 ҳисобида Франклин Гомесни мағлуб этди. Аммо иккинчи баҳсда россиялик жаҳон чемпиони Заур Сидаковга мағлуб бўлди. Сидаков финалга чиқиб, Бекзодга эртанги бронза учун баҳсга йўл очиб берди.

Замонавий бешкураш: Алисэ Фахрутдинова ҳамда Александр Савкин бугун дастлабки йўналиш бўлмиш қиличбозлик бўйича баҳслар ўтказишди. Фахрутдинова 22-поғона, Савкин эса 36-поғонани банд этиб туришибти. Эртага бошқа турларда давом эттиришади.

Кўпкураш. Екатерина Воронина ўз иштирокини 12-ўрин билан тугатди. У тўплаган 6298 очко медаллар учун етарли бўлмади.