Мессининг «Барселона»ни тарк этиши ҳақида ҳатто расмий хабар ҳам чиқиб улгурган бўлса-да, шошилмай туринглар, футболчи барибир "Барселона"да қолиши мумкинлигини назардан қочирмаган бўлардим.

Аслида, Мессининг клуб билан шартномаси бир ой олдин тугаган ва у аллақачон «Барселона» ўйинчиси эмас. Янги шартнома тузилишига эса, клубнинг иқтисодий аҳволи имкон бермаётганди. Бунинг устига Суперлига машмашаси туфайли, клуб билан терс бўлиб қолган Ла Лига «фейр плей» талабларини рўкач қилиб, босим ўтказаётганди.

Бу расмий хабар, яъни «иқтисодий вазият туфайли Месси билан шартнома имзоланмаётгани» қайсидир маънода клубнинг Ла Лигага (ё Мессининг ўзига) жавоби  бўлиши мумкин. Бизни тинч қўйинглар, акс ҳолда, Лига бир жавоҳиридан айрилади, бу ҳам турнир престижига зарба, деган маънода. Нега бўлмасин? Месси шунақа ўйинчики, ўтган ёз "Барса" президентини, бунисида Ла Лига раҳбарини истеъфога чиқариши мумкин...

Ахир Мессининг кетиши, унинг қаергадир бориши дегани, агар футболчи ўзига клуб топганида, аллақачон иси чиқарди. Яъни, Месси билан янги шартнома тузилмаётгани ва унинг кетаётгани ҳақидаги хабар — айни пайтда хабардан бошқа нарса эмасдек, назаримда.

Қаҳрамон Асланов.