Токио—2020 Олимпиадасида эркин кураш бўйича бронза медалини қўлга киритган Бекзод Абдураҳмонов ҳамда ушбу мусобақада Ўзбекистоннинг байроқдори бўлган таэквондочи Нигора Турсунқулова турмуш қурмоқда. Бу ҳақда Бекзоднинг ота-онаси ва опаси «Спорт ТВ» телеканалидаги кўрсатувда маълум қилди.

Уларнинг сўзларига кўра, тўй Олимпиада ўйинлари тугагандан кейин бўлиб ўтади.

Маълумот учун, Бекзод Абдураҳмонов 1990 йилнинг 15 мартида Тошкентда туғилган. У фаолияти мобайнида 2 мартадан Осиё ўйинлари ва Осиё чемпионатида ғолиб бўлган. 2018 йилги Жаҳон чемпионатида эса бронза медални қўлга киритган. Шунингдек, Бекзод Рио-2016 Олимпиадасида ҳам иштирок этган.

Нигора Турсунқулова эса 1999 йилнинг 4 апрель санасида Жиззах вилоятида туғилган. У таэквондо бўйича 2018 йилги Осиё чемпиони ҳисобланади. Шунингдек, Нигора Жакартада ўтган Осиё ўйинларида бронза медалини қўлга киритган.

Қайд этиш ўринли, бунгача ҳам ўзбекистонлик спортчилар ўзаро оила қурган ҳолатлар бўлган. Хусусан, оғир атлетикачи Руслан Нуриддинов 2020 йилнинг февраль ойида синхрон сузиш бўйича терма жамоа аъзоси Алмира Маматказинага уйланганди. Шунингдек, гимнастикачи Оксана Чусовитина ва юнон-рум кураши устаси Баҳодир Қурбонов ҳам оила қурган.