Ўзбекистон олимпия терма жамоаси бош мураббийи Вадим Абрамов, Филиппин терма жамоасига қарши учрашувдан кейин ташкил этилган матбуот анжуманида, БАА олимпиячилари қандай қилиб атиги битта гол ургани ҳолда саккиз очкога эгалик қилаётганини тушунмаётганини маълум қилди. Бу ҳақда «Gulf News» нашри хабар бермоқда.

Эслатиб ўтамиз, Ўзбекистон олимпия терма жамоаси ва Филиппин миллий терма жамоаси ўртасидаги учрашув Абрамов шогирдларининг 3:0 ҳисобидаги ғалабаси билан якунига етган.

БАА олимпия терма жамоаси эса, Ироқ олимпия термасига 0:3 ҳисобида техник ғалаба ёзилганидан сўнг, тўрт учрашувдан кейин саккиз очко тўплаган.

«Тўртта учрашувда атиги битта гол урган жамоа саккиз очкога эгалик қилиб тургани жуда ҳам кулгули ва мен бунга бирор бир изоҳ топа олмаяпман», деди Абрамов.

«БАА икки марта голсиз дуранг қайд этган ва бир марта, Қатарда бўлиб ўтган ўйинда Ироқ олимпиячиларини 1:0 ҳисобида мағлуб этганди. Шундан сўнг уларнинг ҳисобида беш очко бўлиши керак. Бироқ, ФИФАнинг қарори билан уларнинг очколари сони саккизтага етказилди, тўплар нисбати эса 4:0га ўзгарди. Кимдир менга тушунтириб бера оладими: бу учта голнинг муаллифи ким?», дея савол билан мурожаат қилди Абрамов.

«Ҳозирча мана шу нарса мен учун сир бўлиб қолмоқда, ҳеч ким бунга ишонарлироқ изоҳ бера олмаяпти», дея қўшимча қилди Ўзбекистон олимпия терма жамоаси бош мураббийи.

«Вазифани қандай уддалаш мумкинлиги бизга ҳам, бошқа жамоаларга аниқ равшан: олдинда икки ўйин бор ва иккисида ҳам ғалаба қозонмоқ керак. Лондонга бориш учун биз Ироқ ва БААга қарши ўйинларда олти очкони қўлга киритишимиз керак бўлади. Мен футбол нима эканлигини биламан ва шогирдларимга яхши ўйнаш кераклигини уқтираман», деди Ўзбекистон олимпия терма жамоаси бош мураббийи Вадим Абрамов.