Япония пойтахти Токио шаҳрида бўлиб ўтаётган Олимпия ўйинларида ўзбекистонлик боксчи Баҳодир Жалолов олтин медални қўлга киритди.

ХХХII ёзги Олимпия ўйинларининг бокс спорт тури бўйича +91 килограмм вазнда рингга кўтарилган Жалолов финалда америкалик Ричард Торрес билан жанг қилди. 3 раунд давом этган жангда Баҳодир рақибини мағлуб этиб, олтин медаль эгасисига айланди. Бу Ўзбекистон делегациясининг Токио-2020 даги 5-медали ҳисобланади.

Биринчи раундда спортчилар эҳтиёткорлик билан ҳаракат қилишди. Масофани ушлаб тура олган Баҳодир дастлабки 3 дақиқаликда рақибига нисбатан кўпроқ зарба бера олди. Аммо ҳакамларнинг 3 нафари устунликни Торресга тақдим этишди.

Табиийки, бу ҳолат Жалоловнинг жаҳлини чиқарди. У иккинчи бўлимни анча тажовузкор ўтказди. Бутун олимпиада давомида оғир зарбаларни кўтариб келган Ричард ҳамюртимизнинг бу зарбаларини кўтара олмади. Ҳакам ҳисобни очди. Бош устига, америкалик спортчи бошини эгиб хавфли ҳаракатларни кўпайтириб юборгани рефери унга нисбатан расмий огоҳлантириш берди. Натижада иккинчи раундда барчаси ўз жойига тушди ва энди Баҳодир 5:0 ҳисобида олдинга ўтиб олди.

Зарбалардан ўзига келиб улгармаган Торрес учинчи раундда таваккал қилишга интилди, аммо унинг кучи бугунги Баҳодирга етмасди. Ватандошимиз сўнгги бўлимни ҳамда жангни ўз фойдасига ҳал қилди. Якуний ҳисоб — 5:0 (29:26, 29:27, 30:26, 30:26, 29:27).

Учинчи олтин медаль муборак, Ўзбекистон!