Yaponiya poytaxti Tokio shahrida bo‘lib o‘tayotgan Olimpiya o‘yinlarida o‘zbekistonlik bokschi Bahodir Jalolov oltin medalni qo‘lga kiritdi.

XXXII yozgi Olimpiya o‘yinlarining boks sport turi bo‘yicha +91 kilogramm vaznda ringga ko‘tarilgan Jalolov finalda amerikalik Richard Torres bilan jang qildi. 3 raund davom etgan jangda Bahodir raqibini mag‘lub etib, oltin medal egasisiga aylandi. Bu O‘zbekiston delegasiyasining Tokio-2020 dagi 5-medali hisoblanadi.

Birinchi raundda sportchilar ehtiyotkorlik bilan harakat qilishdi. Masofani ushlab tura olgan Bahodir dastlabki 3 daqiqalikda raqibiga nisbatan ko‘proq zarba bera oldi. Ammo hakamlarning 3 nafari ustunlikni Torresga taqdim etishdi.

Tabiiyki, bu holat Jalolovning jahlini chiqardi. U ikkinchi bo‘limni ancha tajovuzkor o‘tkazdi. Butun olimpiada davomida og‘ir zarbalarni ko‘tarib kelgan Richard hamyurtimizning bu zarbalarini ko‘tara olmadi. Hakam hisobni ochdi. Bosh ustiga, amerikalik sportchi boshini egib xavfli harakatlarni ko‘paytirib yuborgani referi unga nisbatan rasmiy ogohlantirish berdi. Natijada ikkinchi raundda barchasi o‘z joyiga tushdi va endi Bahodir 5:0 hisobida oldinga o‘tib oldi.

Zarbalardan o‘ziga kelib ulgarmagan Torres uchinchi raundda tavakkal qilishga intildi, ammo uning kuchi bugungi Bahodirga yetmasdi. Vatandoshimiz so‘nggi bo‘limni hamda jangni o‘z foydasiga hal qildi. Yakuniy hisob — 5:0 (29:26, 29:27, 30:26, 30:26, 29:27).

Uchinchi oltin medal muborak, O‘zbekiston!