25 февраль кунги Жанубий Кореяга қарши ўртоқлик ва 29 февраль кунги Японияга қарши ЖЧ-2014 саралаши доирасидаги ўйинлар учун Ўзбекистон миллий терма жамоаси таркиби эълон қилинди. Бу ҳақда ЎФФ расмий сайти хабар тарқатмоқда.
Айни пайтда бош мураббий Вадим Абрамов Ўзбекистон олимпия терма жамоаси билан ҳориж йиғинида иштирок этмоқда. 21 февраль куни Ироқ олимпия терма жамоасига қарши бўлиб ўтадиган ўйиндан кейин мутахассис олимпия терма жамоасининг тўрт нафар аъзоси: Акбар Исматуллаев, Жасур Ҳасанов, Ойбек Қиличев ва Дилшод Раҳматуллаев билан Сеулга йўл олса, қолган футболчилар 24 февраль куни Мисрга қарши ўйин учун Дубайга қайтиб келишади.
Ўзбекистон миллий терма жамоасига аъзо қолган футболчилар мураббий Шуҳрат Мақсудов билан 22 февраль куни Сеулга етиб боришади.
Учинчи саралаш босқичининг 5-тури доирасидаги Тожикистонга қарши ўйинда Ислом Тўхтахўжаев, Шавкат Муллажонов, Вагиз Галиулин, Одил Аҳмедов, Санжар Турсунов, Александр Гейнрих ва Сервер Жепаров каби футболчилар сариқ карточка ишлаб олишганди. Бунга қадар ҳам мазкур футболчиларнинг сариқ карточкаси бўлгани сабаб, улар Японияга қарши сўнгги турни қўйиб юборишга мажбурлар. Эвазига миллий терма жамоа асосини ташкил қилувчи бу футболчилар ҳал қилувчи босқични сариқ карточкаларсиз бошлаш имконига бўлишади. Мазкур сабабларни инобатга олиб Вадим Абрамов уларни Жанубий Кореяга қарши ўртоқлик ўйинига жалб этмади.
Таркибга назар ташласангиз, ундаги икки нафар дарвозабон - Мурод Зуҳуров ва Акбар Тўраев миллий терма жамоа либосида майдонга тушишмаган. Шунингдек Иброҳим Раҳимов ҳам миллий терма жамоа сафида дебют қилиш имконига эга бўлмоқда. Бир қатор футболчилар эса яқиндагина бўлиб ўтган Кувайт ва БАА миллий терма жамоаларига қарши ўйинда иштирок этишган. Шунингдек Ислом Иномов терма либосида 30талик довонни забт этиш имконига эга бўлмоқда. Қуйида Сеулга йўл оладиган футболчилар рўйхати билан танишинг.
| № | Футболчи | Ампула | Туғилган йили | Жамоа | Ўйинлар сони |
| 1 | Игнатий Нестеров | дарвозабон | 1983 | "Бунёдкор" | 66 |
| 2 | Мурод Зуҳуров | дарвозабон | 1983 | "Насаф" | - |
| 3 | Акбар Тўраев | дарвозабон | 1989 | "Бунёдкор" | - |
| 4 | Анзур Исмоилов | ҳимоячи | 1985 | "Чаньчунь Ятай" | 35 |
| 5 | Акбар Исматуллаев | ҳимоячи | 1991 | "Пахтакор" | 2 |
| 6 | Камолиддин Тожиев | ҳимоячи | 1986 | "Жиангсу" | 7 |
| 7 | Ислом Иномов | ҳимоячи | 1984 | "Локомотив" | 29 |
| 8 | Артём Филипосян | ҳимоячи | 1988 | "Бунёдкор" | 4 |
| 9 | Станислав Андреев | яримҳимоячи | 1988 | "Пахтакор" | 22 |
| 10 | Тимур Кападзе | яримҳимоячи | 1981 | "аш-Шаржа" | 91 |
| 11 | Иброҳим Раҳимов | яримҳимоячи | 1984 | "Локомотив" | - |
| 12 | Ильдор Магдеев | яримҳимоячи | 1984 | "Пахтакор" | 21 |
| 13 | Жасур Ҳасанов | яримҳимоячи | 1989 | "Бухоро" | 3 |
| 14 | Александр Мерзляков | яримҳимоячи | 1986 | "Шўртан" | 2 |
| 15 | Азиз Ҳайдаров | яримҳимоячи | 1985 | "аш-Шабаб" | 40 |
| 16 | Ойбек Қиличев | яримҳимоячи | 1989 | "Пахтакор" | 2 |
| 17 | Дилшод Раҳматуллаев | яримҳимоячи | 1989 | "Локомотив" | 1 |
| 18 | Александр Шадрин | ҳужумчи | 1988 | "Локомотив" | 2 |
| 19 | Баҳодир Насимов | ҳужумчи | 1987 | "Нефтчи" (Боку) | 5 |
| 20 | Шавкат Саломов | ҳужумчи | 1985 | "Бунёдкор" | 8 |
