«Барселона» ҳужумчиси Мемфис Депай «МЮ»даги омадсиз вақтлари ҳақида гапирди. У «El Periodico» нашрига шундай дейди:
«Мен нега бундай бўлгани ҳақида кўп ўйлайман. «МЮ»даги дастлабки мавсумимда мослашдим ва табиийки яхши ўйнай олмадим. У ердаги вазият эски жонажон клубим, «ПСВ»дагидан анча фарқ қилар эди. Мен ўзимга бўлган ишончни ва мураббий Луи ван Гаалнинг ишончини йўқотгандим. Кейинги мавсумда ўзимга келдим, мослашдим ва тажрибалироқ бўлдим. Аммо раҳбарият мураббийни алмаштирди. Жозе Моуриньо жамоани бошқарди ва у таркибдаги футболчилар билан жанжаллаша бошлади. Ўйлайманки, Жозеда асосий таркибда менга имкон бериб кўриш ғояси умуман бўлмаган. У менга ҳеч қачон имкон бермаган. Ҳеч қачон!»
