Бугун Равшан Эрматов ва Ўзбекистон миллий терма жамоаси бош мураббийлигига номзод Сречко Катанец Қашқадарёга ташриф буюриб, вилоятдаги футбол клублар ва уларнинг базаларини кўздан кечиришди.
Словениялик мутахассис «Насаф» U21 ва U18 жамоалар қароргоҳига клуб мураббийлари билан юртимиз футболи ҳамда ёш футболчиларнинг потенциали хусусида суҳбатлашди ва келажакда ўзаро ҳамкорликда фаолият олиб боришга ишонч билдирди.
Шундан сўнг Равшан Эрматов ва Сречко Катанец ОФК кубогининг Марказий минтақаси финал учрашуви доирасидаги «Насаф» — «Аҳал» жамоалари ўртасидаги баҳсни стадиондан кузатиб боришди.
«Марказий» стадионда Қашқадарё вилояти ҳокими Зойир Мирзаев словениялик мутахассисга миллий урф-одатларимизга хос меҳмондўстлик кўрсатди. Шунингдек, вилоят ҳокими ЎФА Фахрийлар кенгаши раиси Тўлаган Исоқовни куни кеча эълон қилинган “Ўзбекистон Республикасида хизмат кўрсатган ёшлар мураббийси” фахрий унвони билан муборакбод этди. Маълумки, Қашқадарё футболи ривожига ҳисса қўшиб келилаётган таниқли мутахассис Сергей Кучеренко яқинда 60 ёшни қаршилади. Равшан Эрматов ЎФА номидан Кучеренкога ташаккурнома ва эсдалик совғаси топширди.
