Юлдуз ҳужумчиси Килиан Мбаппе ёзда ҳам "Реал" да бўлиши мумкин. RMC Sport нашри хабарига кўра, "қироллик" клуби раҳбарияти парижликлар ҳужумчини 160 миллион евро эвазига қўйиб юборишдан бош тортганига қарамай, "ПСЖ" футболчисига бўлган қизиқишни камайтирмаяпти.
Журналистларнинг таъкидлашича, "қаймоқранглилар" 22 ёшли футболчининг трансфери бўйича такомиллаштирилган таклиф тайёрламоқда. Мбаппенинг "ПСЖ" билан тузилган шартномаси 2022 йилнинг ёзигача ҳисобланган, томонлар уни узайтириш борасида келишмаган.
Килиан 2017 йилдан буён Париж клуби либосларини ҳимоя қилиб келмоқда. Аввалроқ, форвард фаолиятини "Сантяго Бернабеу"да давом эттирмоқчи эканлигини маълум қилганди.
