Аргентина терма жамоаси ҳужумчиси Лионель Месси ЖЧ-2022 саралаш босқичи доирасида белгиланган Бразилияга қарши ўйин тўхтатилган пайтда Бразилия соғлиқни назорат қилиш миллий агентлиги вакилига мурожаат қилди.

«Биз 3 кундан буён Бразилиядамиз, бу ўйинни кутдик. Нима учун эртароқ келмадингиз? Бутун дунё бизни кузатяпти» – дея сўради аргентиналик футболчи.

Эслатиб ўтамиз, Аргентина терма жамоасининг 4 нафар аъзоси — Эмилиано Мартинес, Эмилиано Буэндиа (иккиси – «Астон Вилла»), Жовани Ло Чельсо ва Кристиан Ромеро (иккиси – «Тоттенхэм») карантин қоидаларига хилоф равишда мамлакат кирганини рўкач қилиб майдонга Бразилия соғлиқни назорат қилиш агентлиги вакиллари ҳамда полиция кириб келгани учун ўйин 4-дақиқада тўхтатилди. Шундан сўнг баҳс 40 дақиқа тўхтаб турди ва бекор қилинди.

Қоидага кўра, Буюк Британиядан Бразилияга келадиган фуқаролар 14 кунлик карантинда ўтириши шарт. Соғлиқни назорат қилиш хизматининг тасдиқлашича, юқоридаги 4 ўйинчи мамлакат миграция хизматига нотўғри маълумот берган. Яъни улар сўнгги пайтда Буюк Британияда бўлмаганини айтишган.