«Челси»га қарши УЕФА Чемпионлар Лигаси нимчорак финал учрашувида дублга эришган «Наполи» ҳужумчиси Эсекиель Лавесси ўйиндан сўнг ўз фикрлари билан ўртоқлашаркан, жамоаси ғалабасига ишонганини айтиб ўтди. Бу ҳақда «Sky Sport» хабар бермоқда.

Италиянинг «Наполи» ҳамда Англиянинг «Челси» жамоалари ўртасидаги ЕЧЛ 1/8 финал учрашуви неаполликларнинг 3:1 ҳисобидаги иродали ғалабаси билан якунига етди. Дастлаб, 27-дақиқада Хуан Мата ҳисобни очиб, «Челси»ни олдинга олиб чиққан бўлса-да, Лавессининг дубли (39-дақиқа, 65) ва Каванининг битта голи (45) Маццари шогирдлари муҳим ғалабани тортиқ этди.

Дастлабки учрашувдаги ғалабага қарамай, ҳужумчининг фикрича, кейинги босқич йўлланмаси масаласида ишонч билан гапиришга ҳали эрта.

«Ғалаба қозонишимизни кутгандим. Қўшимчасига, бунга ишончим тўла комил эди. Бироқ «Челси» кучли жамоа, шундай экан, бизнинг қарама-қаршилигимизда ҳали ҳеч нима ҳал қилингани йўқ. Биз Лондонда бўлажак - гол уришимиз керак бўлган ўйин олдидан яхшигина устунликка эришдик», деди аргентиналик ҳужумчи.

«Ҳа, айнан мураббийнинг кўрсатмаси билан ҳимояда ҳам кўпроқ ишлашимга тўғри келди. Ҳимоячиларга ёрдам бериш ҳақида кўрсатма берилганди ва биз буни жуда яхши эплай олдик, деб ўйлайман», дея қўшимча қилди футболчи.

«Челси» кўп ҳам керак бўлмаган голни урди, ўша вазиятда инглизларга омад кулиб боқди. Бу вақтгача биз ташаббусга эришиб, нисбатан кўпроқ вазиятларни юзага келтирган эдик. Бахтимизга, ҳисобни тез тенглаштира олдик ва юзага келаётган асабий ҳолат йўққа чиқарилди», деди Лавесси.

«Умуман олганда, биз ўйинни аъло даражада ўтказдик ва «Челси»ни ҳимояда хато қилишга мажбур этиб, бундан фойдаланишга ҳам муваффақ бўлдик», деди «Наполи» ҳужумчиси Эсекиель Лавесси.

Эслатиб ўтамиз, «Наполи» – «Челси» жуфтлиги жавоб учрашуви 14 март, чоршанба куни Лондонда бўлиб ўтади.